A nosa historia

A Asociación Cultural Troula do Ortegal naceu no ano 2008 en San Adrián de Veiga (Ortigueira) coa vontade de manter viva a cultura tradicional galega en toda a comarca do Ortegal.

Desde entón, Troula vén desenvolvendo un intenso labor de promoción do folclore a través de actuacións e eventos culturais. Cada ano organiza unha Xuntanza de Grupos Rexionais, un encontro que xa se consolidou como cita destacada no calendario cultural da zona e, máis recentemente, un Festival de Nadal, que reúne a música e o baile nun ambiente festivo e familiar.

Ao longo da súa traxectoria, o grupo percorreu boa parte da xeografía galega, e mesmo realizou algunhas saídas a nivel nacional, destacando especialmente a súa participación no Festival Internacional do Mundo Celta de Ortigueira, un dos escenarios máis emblemáticos da música tradicional.

A asociación conta cun grupo de cantareiras e cantareiros, corpo de baile tradicional e formación instrumental composta por gaitas, acordeóns e percusión. Os seus integrantes, de todos os grupos de idade, proceden das distintas parroquias do Ortegal.

Hoxe, Troula do Ortegal continúa a súa andaina con ilusión renovada, promovendo o ensino, a práctica e a difusión do folclore galego.